Toshkent metropoliteni bekatlaridagi interval soatlari — poyezdlar ketgan vaqtni ko‘rsatuvchi tablolarning vaqtincha ishlamayotgani Tashkent City ishbilarmonlik markazining qurilishi bilan bog‘liq. Bu haqda “Toshkent jamoat transporti” forumi foydalanuvchilari xabar qoldirgan.
Avvalroq Toshkent metropolitenidagi interval soatlari texnik sabablarga ko‘ra 8-yanvardan 20-yanvargacha vaqtincha ishlamasligi haqida xabar berilgan edi. O‘shanda “texnik sabablar”ning tafsiloti ma’lum emasdi.
Foydalanuvchilardan birining ma’lum qilishicha, Tashkent City’ning qurilishi munosabati bilan Toshkent metropoliteni boshqarmasi binosi va dispetcherlik xizmatini o‘z ichiga olgan muhandislik korpusi buzilmoqda. Shu munosabat bilan dispetcherlik xizmati, aloqa va soatlar bilan bog‘liq boshqa muhandislik inshootlari boshqa joylarga ko‘chirilmoqda.
Aniqlik kiritishlaricha, “Chilonzor” va “O‘zbekiston” yo‘nalishlarining eski dispetcherligining bir qismi Yunusoboddagi “Minor” metro bekatidagi muhandislik-texnologik korpusga ko‘chiriladi, qolgani esa bekatlar bo‘ylab taqsimlab chiqilishi kutilmoqda.
Ma’lumot uchun, Toshkent metropoliteni 29 bekatdan iborat bo‘lib, ma’lumotlarga ko‘ra undan kuniga 180—200 ming yo‘lovchi foydalanadi.
Qurilishi 2017-yil kuzida boshlangan Tashkent City xalqaro ishbilarmonlik markazi Alisher Navoiy, Olmazor, Islom Karimov va Furqat ko‘chalari oralig‘idagi 80 gektar maydonda barpo etilmoqda. Markaz hududida biznes markazlar, savdo va ko‘ngilochar majmualar, mehmonxonalar, kongress-xoll, ko‘p qavatli turar joy binolari, xiyobonlar va sun’iy ko‘l barpo etiladi.
Tashkent City davlat unitar korxonasi direktori Jahongir Ortiqxo‘jayevning so‘zlariga ko‘ra, loyiha to‘rt yilda — 2021-yil oxiriga qadar amalga oshiriladi. O‘zbekiston Prezidenti Shavkat Mirziyoyev Tashkent City’ning qurilishini har 10 kunda shaxsan nazorat qilib turishini ma’lum qilgan.
Tashkent City’ning qurilishi munosabati bilan uning o‘rnida joylashgan O‘qchi va Olmazor mahallalari, shuningdek, bir qator obyektlar — Kinochilar uyi, sobiq O‘qituvchilar uyi (sobiq “Fond Forum” binosi), sobiq O‘rmonchilar uyi (sobiq Respublika OVIRi binosi) va boshqa inshootlar buzilmoqda.
Izoh (0)