Bolalarning ta’lim olishiga takror to‘sqinlik qilganlar 15 sutkagacha ma’muriy qamoq bilan jazolanadi

Ma’muriy javobgarlik to‘g‘risidagi kodeksning 47-moddasiga 2018-yilning 9-yanvardagi O‘RQ-459-son Qonuni bilan o‘zgartirishlar va qo‘shimchalar kiritildi, deb xabar berdi Norma.

Eslatib o‘tamiz, MJtKning 47-moddasida 2 ta ma’muriy huquqbuzarlik ko‘zda tutilgan:

• ota-onalar yoki ularning o‘rnini bosuvchi shaxslar tomonidan voyaga yetmagan bolalarni tarbiyalash va ularga ta’lim berish borasidagi majburiyatlarni bajarmaslik (shu jumladan, voyaga yetmagan bolalarning ma’muriy huquqbuzarlik sodir etishiga olib kelishi) – ya’ni Oila kodeksining (OK) 73-moddasida ko‘zda tutilgan majburiyatlarni pisand qilmaslik;
• bolalarning majburiy umumiy o‘rta ta’lim, o‘rta maxsus, kasb-hunar ta’limi olishiga ota-onalar yoki ularning o‘rnini bosuvchi shaxslar tomonidan to‘sqinlik qilish – ya’ni OKning 73-moddasini buzishda faol harakatlarni bajarish.

1. Ota-onalar yoki ularning o‘rnini bosuvchi shaxslar tomonidan voyaga yetmagan bolalarni tarbiyalash va ularga ta’lim berish borasidagi majburiyatlarni bajarmaslik, shu jumladan, voyaga yetmagan bolalarning ma’muriy huquqbuzarlik sodir etishiga olib kelish huquqbuzarligi birinchi bor sodir etilganida eng kam ish haqining 1/2 baravaridan 3 baravarigacha jarimaga tortiladi;

Agarda huquqbuzarlikning ushbu turi bir yil davomida tarkoran sodir etilsa, EKIHning (eng kam ish haqi — 172 240 so‘m) 3—5 baravari miqdorida jarimaga tortiladi.

2. Bolalarning majburiy umumiy o‘rta ta’lim, o‘rta maxsus, kasb-hunar ta’limi olishiga ota-onalar yoki ularning o‘rnini bosuvchi shaxslar tomonidan to‘sqinlik qilish huquqbuzarligi birinchi bor sodir etilganida eng kam ish haqining 5—10 baravari miqdorida jarimaga tortiladi.

Agarda huquqbuzarlikning ushbu turi bir yil davomida tarkoran sodir etilsa, EKIHning 10—20 baravari miqdorida jarimaga yoki 15 sutka ma’muriy qamoq jazosiga tortiladi.