Тошкент метросидаги интервал соатларининг вақтинча ишламаслиги Tashkent City қурилиши билан боғлиқ

Тошкент метрополитени бекатларидаги интервал соатлари — поездлар кетган вақтни кўрсатувчи таблоларнинг вақтинча ишламаётгани Tashkent City ишбилармонлик марказининг қурилиши билан боғлиқ. Бу ҳақда «Тошкент жамоат транспорти» форуми фойдаланувчилари хабар қолдирган.

Аввалроқ Тошкент метрополитенидаги интервал соатлари техник сабабларга кўра 8 январдан 20 январгача вақтинча ишламаслиги ҳақида хабар берилган эди. Ўшанда «техник сабаблар»нинг тафсилоти маълум эмасди.

Фойдаланувчилардан бирининг маълум қилишича, Tashkent City’нинг қурилиши муносабати билан Тошкент метрополитени бошқармаси биноси ва диспетчерлик хизматини ўз ичига олган муҳандислик корпуси бузилмоқда. Шу муносабат билан диспетчерлик хизмати, алоқа ва соатлар билан боғлиқ бошқа муҳандислик иншоотлари бошқа жойларга кўчирилмоқда.

Аниқлик киритишларича, «Чилонзор» ва «Ўзбекистон» йўналишларининг эски диспетчерлигининг бир қисми Юнусободдаги «Минор» метро бекатидаги муҳандислик-технологик корпусга кўчирилади, қолгани эса бекатлар бўйлаб тақсимлаб чиқилиши кутилмоқда.

Маълумот учун, Тошкент метрополитени 29 бекатдан иборат бўлиб, маълумотларга кўра ундан кунига 180—200 минг йўловчи фойдаланади.

Қурилиши 2017 йил кузида бошланган Tashkent City халқаро ишбилармонлик маркази Алишер Навоий, Олмазор, Ислом Каримов ва Фурқат кўчалари оралиғидаги 80 гектар майдонда барпо этилмоқда. Марказ ҳудудида бизнес марказлар, савдо ва кўнгилочар мажмуалар, меҳмонхоналар, конгресс-холл, кўп қаватли турар жой бинолари, хиёбонлар ва сунъий кўл барпо этилади.

Tashkent City давлат унитар корхонаси директори Жаҳонгир Ортиқхўжаевнинг сўзларига кўра, лойиҳа тўрт йилда — 2021 йил охирига қадар амалга оширилади. Ўзбекистон Президенти Шавкат Мирзиёев Tashkent City’нинг қурилишини ҳар 10 кунда шахсан назорат қилиб туришини маълум қилган.

Tashkent City’нинг қурилиши муносабати билан унинг ўрнида жойлашган Ўқчи ва Олмазор маҳаллалари, шунингдек, бир қатор объектлар — Киночилар уйи, собиқ Ўқитувчилар уйи (собиқ «Фонд Форум» биноси), собиқ Ўрмончилар уйи (собиқ Республика ОВИРи биноси) ва бошқа иншоотлар бузилмоқда.