Rossiya—2018 mundialidan chetda qolgan futbol bo‘yicha O‘zbekiston milliy terma jamoasining JCh—2022 da ishtirok etishi masalasi davlat dasturidan joy olishi mumkin. Bu masala “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” davlat dasturining umumxalq muhokamasiga qo‘yilgan loyihasida alohida aks etgan.
Unda barcha futbol musobaqalarini yetakchi xorij mamlakatlari tajribasidan kelib chiqqan holda o‘tkazishga urg‘u berilgan bo‘lib, futboldagi jiddiy muammolarni hal etishga chaqiriq bor. Shuningdek, xalqaro musobaqalarda yuqori natijalar qayd etish uchun chora tadbirlar ishlab chiqilishi kerak.
Yakuniy taklif 2018-yilning 10-martiga qadar kiritilishi kerak. Bu missiya Sport qo‘mitasi, O‘zbekiston futbol federatsiya hamda Toshkent shahri va barcha viloyatlardagi hokimliklar, shuningdek, Qoraqalpog‘iston vazirlar kengashi tomonidan bajariladi.
Bunda terma jamoalarni shakllantirishning amaldagi tizimi tubdan takomillashtirilishi kerak. Malakali murabbiy va sportchilarni tayyorlashning yangi usuli ko‘rsatilishi joiz.
Shuningdek, chekka hududlarda futbol maydonlarini qurish keng miqyosda tashkil etilishi lozim. Mavjud futbol klublari hamda ularga homiylik qiluvchilarga soliq va boshqa imtiyozlarni yaratish ham davlat dasturidan joy olgan.
Muhokama yuzasidan mazkur loyihaga o‘zbekistonliklar tomonidan izohlar, fikrlar qoldirilmoqda.
Izoh (0)