Россия—2018 мундиалидан четда қолган футбол бўйича Ўзбекистон миллий терма жамоасининг ЖЧ—2022 да иштирок этиши масаласи давлат дастуридан жой олиши мумкин. Бу масала «Фаол тадбиркорлик, инновацион ғоялар ва технологияларни қўллаб-қувватлаш йили» давлат дастурининг умумхалқ муҳокамасига қўйилган лойиҳасида алоҳида акс этган.
Унда барча футбол мусобақаларини етакчи хориж мамлакатлари тажрибасидан келиб чиққан ҳолда ўтказишга урғу берилган бўлиб, футболдаги жиддий муаммоларни ҳал этишга чақириқ бор. Шунингдек, халқаро мусобақаларда юқори натижалар қайд этиш учун чора тадбирлар ишлаб чиқилиши керак.
Якуний таклиф 2018 йилнинг 10 мартига қадар киритилиши керак. Бу миссия Спорт қўмитаси, Ўзбекистон футбол федерация ҳамда Тошкент шаҳри ва барча вилоятлардаги ҳокимликлар, шунингдек, Қорақалпоғистон вазирлар кенгаши томонидан бажарилади.
Бунда терма жамоаларни шакллантиришнинг амалдаги тизими тубдан такомиллаштирилиши керак. Малакали мураббий ва спортчиларни тайёрлашнинг янги усули кўрсатилиши жоиз.
Шунингдек, чекка ҳудудларда футбол майдонларини қуриш кенг миқёсда ташкил этилиши лозим. Мавжуд футбол клублари ҳамда уларга ҳомийлик қилувчиларга солиқ ва бошқа имтиёзларни яратиш ҳам давлат дастуридан жой олган.
Муҳокама юзасидан мазкур лойиҳага ўзбекистонликлар томонидан изоҳлар, фикрлар қолдирилмоқда.
Изоҳ (0)