Ravshan Haydarov murabbiylik qilayotgan O‘zbekiston U23 terma jamoasi Xitoy mezbonlik qiladigan Osiyo Chempionatida ishtirok etadi. Musobaqa yana 3 kundan keyin — 9-yanvar kuni start oladi.
O‘FF Ravshan Haydarov oldiga chempionlik vazifasini qo‘ydi. Osiyo Chempionati 10 kundan so‘ng start oladi
O‘zbekiston mezbon Xitoy bilan bir guruhdan joy olgan. Bu zonada, shuningdek, Qatar va Ummon termalari ham bor. “Championat.asia” nashri raqib jamoa murabbiylari haqida ma’lumot berdi. Bu esa imkoniyatlarni chamalashda kerakli ma’lumot bo‘lishi mumkin.Feliks Sanches — Qatar
Bu mutaxassis bir vaqtning o‘zida Qatar milliy termasini ham boshqaradi. Federatsiya rahbariyati ishonch bildirib, U23 termasini ham taqdim etgan.
Feliks Sanches boshqaruvida Qatar U19 termasi 2014-yilgi Osiyo Chempionatida zafar quchib, katta shov-shuv ko‘targandi. Endi esa ispaniyalik mutaxassis deyarli o‘sha jamoani yana bir marta Osiyo chempioni qilishga urinib ko‘radi.Massimiliano Maddolini — Xitoy
Italiyalik murabbiy Osiyo futboli haqida yaxshi tasavvurga ega. Boisi u 2012—2015-yillar davomida “Guanjou Evergrand” klubida Marchello Lippiga yordamchilik qilgan. Keyinroq esa Xitoy milliy terma jamoasida bosh murabbiyga ko‘maklashdi.
Marchello Lippi, Fabio Kannavaro, Chiro Ferrara kabi hamyurtlari bilan Xitoy futbolini ko‘tarishga harakat qilayotgan bu mutaxassisdan chin o‘lkasi muxlislarining umidi katta.Hamad Al-Azani — Ummon
2002-yildan buyon murabbiy sifatida ishlab kelayotgan Hamad Al-Azani futbolchilik faoliyatini ko‘proq “An-Nahda” klubida o‘tkazdi. U hozir 44 yoshda.
Al-Azani 2007 va 2011-yillarda o‘tgan Osiyo Kubogining saralashida Ummon milliy terma jamoasining murabbiylar shtabida ishladi. 2008-yil esa “An-Nahda”ni OFK Kubogi musobaqasiga bosh murabbiy sifatida boshlab chiqib, tajriba to‘pladi.Ravshan Haydarov — O‘zbekiston
Ravshan Haydarov O‘zbekistonda ancha mashhur. U 2015-yil Yangi Zelandiyada o‘tgan yoshlar o‘rtasidagi Jahon Chempionatida o‘zbekistonliklar bilan chorak finalga qadar yetib borib, osiyoliklar orasida eng yaxshi natijani qayd etgandi. Haydarov “Paxtakor” bilan ikki bor O‘zbekiston chempioni bo‘lgan, mamlakat kubogida zafar quchgan. Uning boshqaruvida O‘zbekiston U19 termasi 2014-yil Osiyo Chempionatining yarim finalida yengilgandi. O‘sha musobaqa yuqorida aytilgani kabi Qatarning g‘alabasi bilan nihoyasiga yetgan.
O‘zbekiston milliy terma jamoasida qayta va qayta ishlaganidan kelib chiqilsa, Haydarov bu borada qolgan raqiblaridan ancha ustun bo‘lishi mumkin. Qolganini guruh bosqichidagi natijalar ko‘rsatib beradi.
Izoh (0)