“Yadro quroli va urushlarsiz dunyo” shiori ostida Yer yuzi bo‘ylab suzishni amalga oshirayogan “Tinchlik kemasi” Gavana portiga yetib keldi. Uning bortida 700 ga yaqin yo‘lovchi, jumladan, bir necha “xibakusya” — Xirosima va Nagasakida atom bombardimonlaridan omon qolgan yaponlar bor, deya xabar beradi “TASS”.
Gavanada kema yo‘lovchilari Kuba xalqlar do‘stligi instituti tomonidan tashkillangan qurolsizlanish forumida ishtirok etdi va orol-davlat yoshlariga yadro quroli keltirishi mumkin bo‘lgan dahshatlar haqida hikoya qildi. “Tinchlik kemasi” bir qismi bo‘lgan Yadro qurolini taqiqlash bo‘yicha xalqaro kampaniya (ICAN) joriy yilda tinchlik bo‘yicha xalqaro Nobel mukofoti taqdim etilgani ta’kidlandi.
Shtab-kvartirasi Tokioda bo‘lgan “Tinchlik kemasi” nohukumat tashkiloti 1983-yilda Yaponiyada tashkil etilgan bo‘lib, hozirda o‘zining 95-suzishini amalga oshirmoqda. Sayohat 13-avgustda Yaponiyada boshlandi va 3 oy davom etadi.
Kema 19 mamlakatda bo‘lishi ko‘zda tutilgan, hozirgacha Gretsiya, Fransiya va AQShda bo‘lishga ulgurdi. Kubadan so‘ng Meksika, Panama va Nikaraguada to‘xtab o‘tish rejalashtirilmoqda.
Izoh (0)