Oq uy: Suriya hukumati yangi kimyoviy hujumni tayyorlamoqda

Suriya hukumati tinch aholi vakillari halok bo‘lishiga olib kelishi mumkin bo‘lgan yangi kimyoviy hujumga tayyorgarlik ko‘rmoqda. Bu haqda Oq uy matbuot kotibi Shon Spayserning bayonotida aytiladi, deb yozadi “Gazeta.ru”.

“AQSh Suriya prezidenti Bashar Asad rejimi navbatdagi kimyoviy hujumga potensial tayyorgarlikni aniqladi, u tinch aholi vakillari, shu jumladan, begunoh bolalar o‘limiga olib kelishi mumkin. Tayyorgarlik ishlari Asad rejimi 2017-yil 4-apreldagi hujum arafasida olib borgan ishlarga o‘xshash”, — deyiladi xabarda.

Spayser AQSh Suriyada IShIDga qarshi kurash uchun turganini aytdi. “Ammo agar Asad kimyoviy qurolni qo‘llash orqali yana bir ommaviy hujumni amalga oshirsa, u va uning armiyasi buning uchun katta badal to‘laydi”, — deya ta’kidladi Oq uy vakili.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.