Alisher Usmonovning Navalniyga qarshi da’vosini ko‘rib chiqadigan sud Rossiya bosh vaziri Medvedevni guvoh sifatida chaqirishdan bosh tortdi

Milliarder Alisher Usmonovning rossiyalik muxolifatchi Aleksey Navalniyga nisbatan da’vosini ko‘rib chiqayotgan Moskvaning Lyublino tumani sudi Rossiya bosh vaziri Dmitriy Medvedev va bosh vazir o‘rinbosari Igor Shuvalovni guvoh sifatida chaqirishdan bosh tortdi. Bu haqda Meduza xabar bermoqda.

Medvedev va Shuvalovni sudga chaqirish istagi javobgar tomon — Navalniy tomonidan bildirilgan edi.

“Mediazona” xabariga ko‘ra, sud javobgar tomonning “Rosreyestr”dan olingan ma’lumotnomalarni ishga qo‘shish va yangi ma’lumotlar paydo bo‘lgani munosabati bilan ishning ko‘rib chiqilishini kechiktirish haqidagi iltimosini rad etgan. Ayni vaqtda, da’vogar tomon sud majlisining qoldirilishiga e’tirozi yo‘qligini bildirgan edi.

Alisher Usmonov Navalniyga qarshi or-nomus va obro‘ himoyasi to‘g‘risida da’vo bergan. Da’voga Navalniy boshli “Korrupsiyaga qarshi kurash fondi” tomonidan tayyorlangan “U sizga Dimon emas” nomli surishtiruvi sabab bo‘lgan; unda Alisher Usmonov Rossiya bosh vaziri Dmitriy Medvedevning yaqinlariga mulk sovg‘a qilgani ta’kidlanadi, Navalniy bu sovg‘alarni “pora” deb atagan.