Fransiyada antiterror operatsiyasi chog‘ida 6 kishi qo‘lga olindi

Fransiya huquq-tartibot organlari Parij va Bordo shaharlaridagi antiterror operatsiyasi davomida 6 kishini qo‘lga oldi. Bu haqda BFMTV telekanaliga tayanib, “RIA Novosti” xabar berdi.

Telekanal ma’lumotlariga ko‘ra, 29-may kuni boshlangan operatsiya 30-may kuni tongda davom etdi. Operatsiya chog‘ida ikki ayol va to‘rt erkak ushlandi.

Qo‘lga olinganlar odamlarni Suriyaga jo‘natish bilan shug‘ullanuvchi tarmoqqa aloqador bo‘lgan. Ulardan biri, 48 yoshli erkak ilgari Guantanamo turmasida 8 yillik jazo muddatini o‘tagani xabar qilinmoqda.