Алишер Усмоновнинг Навальнийга қарши даъвосини кўриб чиқадиган суд Россия бош вазири Медведевни гувоҳ сифатида чақиришдан бош тортди

Миллиардер Алишер Усмоновнинг россиялик мухолифатчи Алексей Навальнийга нисбатан даъвосини кўриб чиқаётган Москванинг Люблино тумани суди Россия бош вазири Дмитрий Медведев ва бош вазир ўринбосари Игорь Шуваловни гувоҳ сифатида чақиришдан бош тортди. Бу ҳақда Meduza хабар бермоқда.

Медведев ва Шуваловни судга чақириш истаги жавобгар томон — Навальний томонидан билдирилган эди.

«Медиазона» хабарига кўра, суд жавобгар томоннинг «Росреестр»дан олинган маълумотномаларни ишга қўшиш ва янги маълумотлар пайдо бўлгани муносабати билан ишнинг кўриб чиқилишини кечиктириш ҳақидаги илтимосини рад этган. Айни вақтда, даъвогар томон суд мажлисининг қолдирилишига эътирози йўқлигини билдирган эди.

Алишер Усмонов Навальнийга қарши ор-номус ва обрў ҳимояси тўғрисида даъво берган. Даъвога Навальний бошли «Коррупцияга қарши кураш фонди» томонидан тайёрланган «У сизга Димон эмас» номли суриштируви сабаб бўлган; унда Алишер Усмонов Россия бош вазири Дмитрий Медведевнинг яқинларига мулк совға қилгани таъкидланади, Навальний бу совғаларни «пора» деб атаган.