Malayziya huquq-tartibot idoralari Filippin bilan chegaradosh tumanlarda mazkur mamlakat janubida harbiy holat joriy etilganidan so‘ng xavfsizlik choralarini kuchaytirdi. Bu haqda milliy politsiya rahbari Xolid Abu Bakr ma’lum qildi, deya xabar berdi “TASS”.
“Qo‘shni davlatda yuz berayotgan hodisalar sababli, xususan, Malayziya sharqi va Filippin janubini ajratib turuvchi Sulu dengizi akvatoryasida ehtiyot choralari ko‘rildi. Ekstremistlarning bir qismi dengiz orqali Filippinni tark etish va Saboh shtatiga o‘tishga urinishidan xavotirdamiz”, — dedi Xolid Abu Bakr.
Filippin prezidenti Rodrigo Duterte 23-may kuni hukumat kuchlari va IShID bilan bog‘liq guruhlar o‘rtasida qurolli to‘qnashuvlar ketayotgan Mindanao provinsiyasida harbiy holat joriy etdi.
Vaziyat murakkab tus olgan Maravi shahrining 200 mingga yaqin aholisi 25-may, payshanba kuni mahalliy vaqt bilan 13.00 ga qadar o‘z uylarini tark etishi lozim. Duterte harbiy holat yil davomida amalda bo‘lishini istisno etmadi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)