Малайзия ҳуқуқ-тартибот идоралари Филиппин билан чегарадош туманларда мазкур мамлакат жанубида ҳарбий ҳолат жорий этилганидан сўнг хавфсизлик чораларини кучайтирди. Бу ҳақда миллий полиция раҳбари Холид Абу Бакр маълум қилди, дея хабар берди «ТАСС».
«Қўшни давлатда юз бераётган ҳодисалар сабабли, хусусан, Малайзия шарқи ва Филиппин жанубини ажратиб турувчи Сулу денгизи акваторясида эҳтиёт чоралари кўрилди. Экстремистларнинг бир қисми денгиз орқали Филиппинни тарк этиш ва Сабоҳ штатига ўтишга уринишидан хавотирдамиз», — деди Холид Абу Бакр.
Филиппин президенти Родриго Дутерте 23 май куни ҳукумат кучлари ва ИШИД билан боғлиқ гуруҳлар ўртасида қуролли тўқнашувлар кетаётган Минданао провинциясида ҳарбий ҳолат жорий этди.
Вазият мураккаб тус олган Марави шаҳрининг 200 мингга яқин аҳолиси 25 май, пайшанба куни маҳаллий вақт билан 13.00 га қадар ўз уйларини тарк этиши лозим. Дутерте ҳарбий ҳолат йил давомида амалда бўлишини истисно этмади.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)