AQSh prezidenti Donald Tramp tomonidan imzolangan qochoqlarni qabul qilish dasturini to‘xtatish to‘g‘risidagi farmon kuchga kirganidan so‘ng, Nyu-Yorkdagi Kennedi aeroportida ikki qochoq qo‘lga olindi. Bu haqda “Kommersant” xabar bermoqda.
Iroqlik bu qochoqlarning advokatlari Nyu-Yorkning Sharqiy okrugi sudidan gumonlanuvchilarga nisbatan “xabeas korpus” jarayoni (hibsga olishning noqonuniyligi sudda da’vo qilinishi)ni qo‘llashni so‘radi.
The New York Times’ning yozishicha, hozircha AQShga kirishga urinish vaqtida qancha qochoq qo‘lga olingani haqida aniq ma’lumotlar yo‘q.
Avvalroq Qohiradan Nyu-Yorkka uchmoqchi bo‘lgan iroqlik oilaga samolyotga chiqish ruxsat berilmagani haqida xabar berilgan edi. Ularning Amerika vizalari hamda EgyptAir samolyoti bortida qonuniy band qilingan o‘rinlari bo‘lgan.
Shunga qaramay, AQShda yangi qoidalar joriy etilgani munosabati bilan, ularning Amerikaga uchib ketishiga ruxsat berilmagan. Bu oiladan tashqari, bir yamanlikka ham Qohiradan Nyu-Yorkka uchishga ruxsat berilmagan.
Yangi qoidalar kuchga kirganidan so‘ng, Qatar Airways aviakompaniyasi 28-yanvardan boshlab AQShga yo‘l olayotgan Sudan, Liviya, Somali, Suriya, Eron, Iroq va Yaman vakillarini AQShga kirish uchun ularda yo “yashil karta” (grin-karta) yoki diplomatik viza bo‘lishi lozimligi haqida ogohlantirishni boshladi.
Avvalroq Donald Tramp qochoqlarni qabul qilish dasturini 120 kunga to‘xtatib qo‘yishni nazarda tutuvchi farmonni imzolagan edi. Eslatib o‘tamiz, AQSh prezidenti Donald Tramp saylov vaqtida bergan va’dasini bajarish maqsadida noqonuniy muhojirlik ko‘lamini qisqartirish va milliy xavfsizlikni kuchaytirish bo‘yicha dasturlarni amalga oshirishga kirishgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)