“Nima, ko‘p yillar avval Berlin devori qulagani yoddan chiqdimi?”. Eron prezidenti Donald Trampni tanqid qildi

Eron prezidenti Hasan Ruhoniy AQSh prezidenti Donald Trampning qochoqlar va Meksika bilan chegarada devor qurish haqidagi farmonlariga munosabat bildirdi, deya xabar bermoqda Tasnim nashri.

“Hozir mamlakatlar o‘rtasida devorlar quradigan zamon emas. Nima, ular bundan ko‘p yillar avval Berlin devori qulaganini yoddan chiqarishdimi?”, — dedi Ruhoniy.

Ruhoniyning qayd etishicha, agar hozir biror-bir mamlakat o‘rtasida devorlar bo‘lsa, “ularni ham yo‘q qilish kerak”.

Eron prezidentining so‘zlariga ko‘ra, hozirgi kunda madaniy, ilmiy va sivilizatsiya jihatidan hamma bir-biriga qo‘shni, texnologiyalar esa turli davlatlar orasidagi ulkan masofalarni ortda qoldirishga imkon bermoqda.

“Bugungi kunda hech kim globallashuvga qarshi turish qudratiga ega emas”, — deya qayd etdi Ruhoniy.

Avvalroq AQSh prezidenti Donald Tramp saylovoldi va’dalaridan birini bajarish maqsadida, Meksika bilan chegarada devor qurish haqidagi farmonni imzolagan edi. Tramp qurilish bilan bog‘liq xarajatlarni qoplash uchun Meksikadan import qilinadigan mahsulotlarga soliq solmoqchi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.