АҚШ президенти Дональд Трамп томонидан имзоланган қочоқларни қабул қилиш дастурини тўхтатиш тўғрисидаги фармон кучга кирганидан сўнг, Нью-Йоркдаги Кеннеди аэропортида икки қочоқ қўлга олинди. Бу ҳақда «Коммерсантъ» хабар бермоқда.
Ироқлик бу қочоқларнинг адвокатлари Нью-Йоркнинг Шарқий округи судидан гумонланувчиларга нисбатан «хабеас корпус» жараёни (ҳибсга олишнинг ноқонунийлиги судда даъво қилиниши)ни қўллашни сўради.
The New York Times’нинг ёзишича, ҳозирча АҚШга киришга уриниш вақтида қанча қочоқ қўлга олингани ҳақида аниқ маълумотлар йўқ.
Аввалроқ Қоҳирадан Нью-Йоркка учмоқчи бўлган ироқлик оилага самолётга чиқиш рухсат берилмагани ҳақида хабар берилган эди. Уларнинг Америка визалари ҳамда EgyptAir самолёти бортида қонуний банд қилинган ўринлари бўлган.
Шунга қарамай, АҚШда янги қоидалар жорий этилгани муносабати билан, уларнинг Америкага учиб кетишига рухсат берилмаган. Бу оиладан ташқари, бир яманликка ҳам Қоҳирадан Нью-Йоркка учишга рухсат берилмаган.
Янги қоидалар кучга кирганидан сўнг, Qatar Airways авиакомпанияси 28 январдан бошлаб АҚШга йўл олаётган Судан, Ливия, Сомали, Сурия, Эрон, Ироқ ва Яман вакилларини АҚШга кириш учун уларда ё «яшил карта» (грин-карта) ёки дипломатик виза бўлиши лозимлиги ҳақида огоҳлантиришни бошлади.
Аввалроқ Дональд Трамп қочоқларни қабул қилиш дастурини 120 кунга тўхтатиб қўйишни назарда тутувчи фармонни имзолаган эди. Эслатиб ўтамиз, АҚШ президенти Дональд Трамп сайлов вақтида берган ваъдасини бажариш мақсадида ноқонуний муҳожирлик кўламини қисқартириш ва миллий хавфсизликни кучайтириш бўйича дастурларни амалга оширишга киришган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)