Milan prokuraturasi mamlakatning sobiq bosh vaziri Silvio Berluskoniga qarshi surishtiruvni qaytadan boshladi. Bu haqda La Repubblica gazetasi ma’lum qildi, deb yozadi “RBK”.
U voyaga yetmagan fohishalar xizmatidan foydalanish ishi bo‘yicha guvohlarni pora berib sotib olishda ayblanmoqda.
Nashrning ma’lum qilishicha, Berluskoni o‘tgan yilning noyabr oyi oxiriga qadar Arkoredagi villasida uyushtirilgan bayramlarda mehmonlar ro‘yxatiga kiritilgan “to‘rt nafar qiz”ga pul to‘lashda davom etgan. U pullarni shaxsiy buxgalteri Juzeppe Spinelli orqali yetkazgan.
Prokuraturaning yangi xulosasiga ko‘ra, o‘tgan yilning sentabridan buyon qizlar o‘nta to‘lovni qo‘lga kiritgan. Ulardan har biri ikki mingdan uch ming yevrogacha bo‘lgan. Tergov taxminiga ko‘ra, qizlar Rubi ishi bo‘yicha yolg‘on ko‘rsatma berganlik uchun haq olgan.
Rubi laqabi bilan taniqli bo‘lgan marokashlik raqqosa Karima al Marug tufayli o‘z nomini olgan ish bo‘yicha tergov 2011-yilda boshlangan edi. Italiyalik siyosatchi o‘sha vaqtda 18 yoshga to‘lmagan raqqosa bilan yaqin aloqada bo‘lganlikda ayblangan edi. Biroq keyinchalik Berluskoni voqeada aybsiz deb topilib oqlangandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)