Милан прокуратураси мамлакатнинг собиқ бош вазири Сильвио Берлусконига қарши суриштирувни қайтадан бошлади. Бу ҳақда La Repubblica газетаси маълум қилди, деб ёзади «РБК».
У вояга етмаган фоҳишалар хизматидан фойдаланиш иши бўйича гувоҳларни пора бериб сотиб олишда айбланмоқда.
Нашрнинг маълум қилишича, Берлускони ўтган йилнинг ноябрь ойи охирига қадар Аркоредаги вилласида уюштирилган байрамларда меҳмонлар рўйхатига киритилган «тўрт нафар қиз»га пул тўлашда давом этган. У пулларни шахсий бухгалтери Жузеппе Спинелли орқали етказган.
Прокуратуранинг янги хулосасига кўра, ўтган йилнинг сентябридан буён қизлар ўнта тўловни қўлга киритган. Улардан ҳар бири икки мингдан уч минг еврогача бўлган. Тергов тахминига кўра, қизлар Руби иши бўйича ёлғон кўрсатма берганлик учун ҳақ олган.
Руби лақаби билан таниқли бўлган марокашлик раққоса Карима ал Маруг туфайли ўз номини олган иш бўйича тергов 2011 йилда бошланган эди. Италиялик сиёсатчи ўша вақтда 18 ёшга тўлмаган раққоса билан яқин алоқада бўлганликда айбланган эди. Бироқ кейинчалик Берлускони воқеада айбсиз деб топилиб оқланганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)