AQSh prezidenti Donald Tramp hindularning yerlari orqali neft quvuri qurilishiga qo‘yilgan taqiqni olib tashladi, deb yozadi TJournal. Vaqtinchalik taqiq 2016-yil dekabridan buyon amal qilib kelgan edi. Uni Barak Obama ma’muriyati mamlakat tub aholisi vakillarining uzoq davom etgan norozilik namoyishlari fonida kiritgan edi.
Tramp muhandislarga qurilish bo‘yicha rejalarni baholashni va eng qisqa muddatlarda ishlarni davom ettirishni buyurdi. Prezident quvurlar endi faqat AQSh ichkarisiga qo‘yilishini, buning uchun zarur material ham faqat mamlakat ichkarisida tayyorlanishini ta’kidladi.
AQSh tub aholisi vakili Deyv Archamboul prezidentning xatti-harakatlarini xato deb atadi. Uning fikricha, Amerika xalqi qurilish hindularning roziligisiz boshlanganidan xabardor. Archamboul sudda neft quvurlari bo‘yicha qaror bekor qilinishiga erishishga va’da berdi.
Dastlabki rejaga ko‘ra, quvur hindularning yerlaridan o‘tishi kerak edi, bu tub aholi o‘rtasida norozilikka sabab bo‘ldi. Ular neft quvuri tabiatni ifloslantirishini va ularning muqaddas makonlarini barbod qilishini aytdi.
2016-yil dekabrida AQSh hukumati Shimoliy Dakotadagi neft quvuri qurilishini noma’lum muddatga to‘xtatib, muqobil yo‘nalishlarni ko‘rib chiqishga qaror qilgan edi.
Izoh (0)