“Kasperskiy laboratoriyasi”ning kompyuter bilan bog‘liq hodisalarni o‘rganish bo‘limi rahbari Ruslan Stoyanov 2016-yil dekabridan buyon “Lefortovo” tergov izolyatorida hibsda saqlanmoqda. Bu haqda “Kommersant”ga Federal xavfsizlik xizmatiga (FXX) yaqin manbasi ma’lum qildi. Kompaniya matbuot xizmati hibs amalga oshganini tasdiqladi va tergov “alohida shaxsga nisbatan olib borilayotgani”ni ta’kidladi.
Nashr ma’lumotlariga ko‘ra, hibs FXX axborot xavfsizligi markazi (AXM) rahbari o‘rinbosarlaridan biriga nisbatan tekshiruv bilan bog‘liq bo‘lishi mumkin. Bir vaqtning o‘zida o‘sha ish bo‘yicha AXM bo‘linmalaridan birining boshlig‘i Sergey Mixaylov ham hibsga olingan. Tergov Rossiya jinoyat kodeksining “Davlatga xiyonat” moddasi bo‘yicha olib borilmoqda.
Gazeta manbalari ma’lum qilishicha, xususan, AXMning kiberjinoyatlar bo‘yicha ekspertizalar o‘tkazishda hamkorlik qilgan xususiy kompaniyalar bilan o‘zaro aloqalari tekshirilmoqda. Go‘yoki AXM xodimi axborot xavfsizligi sohasidagi qandaydir Rossiya kompaniyasi xodimi vositachiligida xorijiy tashkilotlardan pul olgani haqidagi ma’lumot tekshirilmoqda.
Izoh (0)