АҚШ президенти Дональд Трамп ҳиндуларнинг ерлари орқали нефть қувури қурилишига қўйилган тақиқни олиб ташлади, деб ёзади TJournal. Вақтинчалик тақиқ 2016 йил декабридан буён амал қилиб келган эди. Уни Барак Обама маъмурияти мамлакат туб аҳолиси вакилларининг узоқ давом этган норозилик намойишлари фонида киритган эди.
Трамп муҳандисларга қурилиш бўйича режаларни баҳолашни ва энг қисқа муддатларда ишларни давом эттиришни буюрди. Президент қувурлар энди фақат АҚШ ичкарисига қўйилишини, бунинг учун зарур материал ҳам фақат мамлакат ичкарисида тайёрланишини таъкидлади.
АҚШ туб аҳолиси вакили Дейв Арчамбоул президентнинг хатти-ҳаракатларини хато деб атади. Унинг фикрича, Америка халқи қурилиш ҳиндуларнинг розилигисиз бошланганидан хабардор. Арчамбоул судда нефть қувурлари бўйича қарор бекор қилинишига эришишга ваъда берди.
Дастлабки режага кўра, қувур ҳиндуларнинг ерларидан ўтиши керак эди, бу туб аҳоли ўртасида норозиликка сабаб бўлди. Улар нефть қувури табиатни ифлослантиришини ва уларнинг муқаддас маконларини барбод қилишини айтди.
2016 йил декабрида АҚШ ҳукумати Шимолий Дакотадаги нефть қувури қурилишини номаълум муддатга тўхтатиб, муқобил йўналишларни кўриб чиқишга қарор қилган эди.
Изоҳ (0)