Moldova prezidenti NATO va Rossiya tomonidan mamlakatning betarafligi tan olinishini yoqlab chiqdi
Moldova yetakchisi Igor Dodon NATO rahbariyati bilan fevral boshida Bryusselda alyansning Kishinyovdagi ofisi ochilishi atrofidagi vaziyatni muhokama qilmoqchi, u o‘z mamlakatining betarafligini yoqlab chiqishi tufayli, tegishli deklaratsiyani imzolash kerak deb hisoblaydi. Bu haqda “Interfaks” xabar berdi.
Uning so‘zlariga ko‘ra, Bryusselga tashrif 6—7-fevral kunlari bo‘lib o‘tadi. U “betaraflik maqomi haqida samimiy munozara” o‘tkazish uchun NATO rahbariyatidan uchrashuv tashkil qilishni so‘raganini aytdi.
“NATO Moldovaning betarafligini tan olishi haqida deklaratsiya imzolasak, juda soz bo‘lardi. Boshqa tomon bilan ham imzolash mumkin. Men Rossiyaga zid holda G‘arbda va G‘arbga zid holda Rossiyada o‘zimga do‘st topishni istamayman. Biz bunga yo‘l qo‘ymasligimiz kerak, biz Moldova hududida harbiy bazalar va chet el qo‘shinlariga ega bo‘lishimiz kerak emas. Moldova Dnestrbo‘yi nizosi hal bo‘lgach, na NATOning, na Rossiyaning qo‘shinlari bo‘lmagan mamlakatga aylanishi kerak, deb hisoblayman. Hozir rossiyalik tinchlikparvarlar bor, nizo tartibga solingach, hech kimning keragi bo‘lmaydi. Moldovaliklar kim uchundir to‘p yemi bo‘lishini istamayman”, — dedi Dodon.
