AQSh mudofaa vaziri lavosimiga nomzod bo‘lgan dengiz piyoda qo‘shinlari faxriysi, general Jeyms Mettis Rossiyani Amerika uchun asosiy xavf deb atadi. Xuddi shunday fikrni Markaziy razvedka boshqarmasi rahbarligiga da’vogarlik qilayotgan respublikachi Mayk Pompeo ham bildirdi, deb yozadi TJournal.
Pentagonning ehtimoliy rahbari so‘zlariga ko‘ra, Rossiya, shuningdek, Xitoy va ekstremistlar Ikkinchi jahon urushi davridan keyin eng katta tahdid bo‘lib hisoblanadi.
Rossiya tomonidan tahdidlarga misol tariqasida mudofaa vazirligiga nomzod, saylovoldi kampaniyasi chog‘idagi kiberhujumlarni tilga oldi. Shuningdek, Mettisning ta’kidlashicha, Rossiya boshqa mamlakatlardagi vaziyatlarni beqarorlashtirish uchun mahalliy nizolar taktikasini qo‘llaydi, Putin esa NATOni parchalashga urinmoqda.
MRB rahbarligiga nomzod Mayk Pompeo ham razvedkaning AQShdagi kiberhujumlarga Rossiyaning aloqasi borligi haqidagi bayonotlarini asosli deb atadi hamda Ukrainadagi vaziyatni Rossiyaning xavfliligiga misol qilib keltirdi.
Shu bilan birga, Pompeo Rossiya Yevropa uchun ham xavf tug‘dirishini va IShIDga qarshi kurashda yordam berish uchun hech narsa qilmayotganini ta’kidladi.
Izoh (0)