Qozog‘istonning Qarag‘anda viloyati, Shaxan posyolkasida ko‘p qavatli uyning bir qismi qulab tushishi oqibatida jabrlanganlarga zarur yordam ko‘rsatiladi. Bu haqda viloyat hokimi Nurmuhambet Abdibekov ma’lum qildi, deya xabar beradi “Interfaks”.
“Jabrlangan oilalarga moddiy yordam ko‘rsatiladi, dafn marosimlarini o‘tkazishda ko‘mak beriladi. Favqulodda holat sabablarini aniqlash uchun respublika darajasida komissiya tuziladi. Hozir asosiy masala vayronalar ostida qolgan yerto‘laga yetib borish, u yerda baxtsiz hodisaga sabab bo‘lgan isitish tizimi qozonxonasi joylashgan. Tegishli ekspertiza qozonxona nima sababdan portlaganiga oydinlik kiritishi lozim”, — deya ta’kidladi viloyat hokimi.
Hodisa yuzasidan mamlakat jinoiy kodeksining “Ikki va undan ortiq kishi halok bo‘lishiga olib kelgan yong‘in xavfsizligi qoidalarining buzilishi” moddasi bo‘yicha jinoiy ish ochildi.
Eslatib o‘tamiz, Shaxan posyolkasida ko‘p qavatli uyning bir qismi qulab tushishi tufayli 9 kishi halok bo‘ldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)