Қозоғистоннинг Қарағанда вилояти, Шахан посёлкасида кўп қаватли уйнинг бир қисми қулаб тушиши оқибатида жабрланганларга зарур ёрдам кўрсатилади. Бу ҳақда вилоят ҳокими Нурмуҳамбет Абдибеков маълум қилди, дея хабар беради «Интерфакс».
«Жабрланган оилаларга моддий ёрдам кўрсатилади, дафн маросимларини ўтказишда кўмак берилади. Фавқулодда ҳолат сабабларини аниқлаш учун республика даражасида комиссия тузилади. Ҳозир асосий масала вайроналар остида қолган ертўлага етиб бориш, у ерда бахтсиз ҳодисага сабаб бўлган иситиш тизими қозонхонаси жойлашган. Тегишли экспертиза қозонхона нима сабабдан портлаганига ойдинлик киритиши лозим», — дея таъкидлади вилоят ҳокими.
Ҳодиса юзасидан мамлакат жиноий кодексининг «Икки ва ундан ортиқ киши ҳалок бўлишига олиб келган ёнғин хавфсизлиги қоидаларининг бузилиши» моддаси бўйича жиноий иш очилди.
Эслатиб ўтамиз, Шахан посёлкасида кўп қаватли уйнинг бир қисми қулаб тушиши туфайли 9 киши ҳалок бўлди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)