Rossiya tergov qo‘mitasi Qora dengizga qulagan Tu-154 halokati bo‘yicha tekshirishlarni boshladi

Rossiya tergov qo‘mitasi mamlakat mudofaa vazirligiga qarashli Tu-154 samolyotining halokati yuzasidan tekshirishlarni boshlab yubordi. Bu haqda “TASS” xabar bermoqda.

Adler aeroportidan uchib chiqqan samolyot bortida Rossiya havo-kosmik kuchlarining Suriyadagi Hmeymim aviabazasida xizmat o‘tayotgan aviaguruhni Yangi Yil bilan tabriklashga yo‘l olgan Aleksandrov nomli ansambl musiqachilari, harbiy xizmatchilar va OAV vakillari bor edi. Samolyot radarlardan g‘oyib bo‘lganidan bir muddat o‘tib Sochi sohilidan 1,5 kilometr naridan, 50–70 metr suv ostidan samolyot korpusining bo‘laklari topildi.

Tergov qo‘mitasi vakili Svetlana Petrenkoning ma’lum qilishicha, samolyot bortida 83 yo‘lovchi va sakkiz nafar ekipaj a’zosi bo‘lgan. Halokat joyida qidiruv-qutqaruv operatsiyasi o‘tkazilmoqda, unda mudofaa vazirligi favqulodda vaziyatlar vazirligi bilan hamkorlik qilmoqda.

Tergovchilar Tu-154 ni parvozga tayyorlaganlarni so‘roq qilmoqda va ularning hujjatlarini tekshirmoqda.