Россия тергов қўмитаси мамлакат мудофаа вазирлигига қарашли Ту-154 самолётининг ҳалокати юзасидан текширишларни бошлаб юборди. Бу ҳақда «ТАСС» хабар бермоқда.
Адлер аэропортидан учиб чиққан самолёт бортида Россия ҳаво-космик кучларининг Суриядаги Ҳмеймим авиабазасида хизмат ўтаётган авиагуруҳни Янги Йил билан табриклашга йўл олган Александров номли ансамбль мусиқачилари, ҳарбий хизматчилар ва ОАВ вакиллари бор эди. Самолёт радарлардан ғойиб бўлганидан бир муддат ўтиб Сочи соҳилидан 1,5 километр наридан, 50–70 метр сув остидан самолёт корпусининг бўлаклари топилди.
Тергов қўмитаси вакили Светлана Петренконинг маълум қилишича, самолёт бортида 83 йўловчи ва саккиз нафар экипаж аъзоси бўлган. Ҳалокат жойида қидирув-қутқарув операцияси ўтказилмоқда, унда мудофаа вазирлиги фавқулодда вазиятлар вазирлиги билан ҳамкорлик қилмоқда.
Терговчилар Ту-154 ни парвозга тайёрлаганларни сўроқ қилмоқда ва уларнинг ҳужжатларини текширмоқда.
Изоҳ (0)