Rossiya muftiylar kengashining oliy mukofoti — birinchi darajali “Al-Faxr” ordeni tadbirkor Alisher Usmonovga Rossiya muftiylar kengashi va Rossiya musulmonlari diniy boshqarmasi raisi Ravil Gaynutdin tomonidan topshirildi, deya xabar bermoqda “TASS”.
Tadbirkor Rossiyadagi eng yirik metsenat (fan va san’atga homiylik qiluvchi davlatmand odam)lardan biri hisoblanadi. U sport, madaniyat, fan va ta’limga aloqador loyihalarni qo‘llab-quvvatlaydi, shuningdek, islomning diniy va madaniy merosini saqlashga o‘z hissasini qo‘shadi. Xususan, Usmonov Qozondagi Oq masjid va Tataristondagi Bulg‘or islom akademiyasi qurilishiga hamda Chita jome’ masjidi ta’miriga mablag‘lar ajratgan.
“O‘zini o‘z ruhi bilan uyg‘un his qilish uchun o‘z e’tiqodiga ega bo‘lish kerak, o‘z dindoshlariga yaqin bo‘lish kerak. Men musulmonman va musulmon o‘g‘liman — o‘z yaqinlari, o‘z dindoshlari uchun qilinadigan savob ish, mening fikrimcha, hayotning eng asosiy mazmunidir”, — deya Usmonov gaplaridan iqtibos keltirdi nashr.
Metsenat “odamlarga yaxshilik qilib, buning evaziga hech qanday minnatdorchilikni kutmaslikka harakat qilish” muhimligini ta’kidladi.
Izoh (0)