Moldovaning yangi saylangan prezidenti Igor Dodon Ruminiya sobiq prezidenti Trayan Besesku bilan uchrashishdan bosh tortganini ma’lum qildi, deb yozadi “Interfaks”.
Tegishli izohni u 27-noyabr, yakshanba kuni Facebook’da Beseskuning Dodon uning maslahatlariga quloq tutishi kerakligi haqidagi bayonotiga javoban yozdi.
“Demak shu sababli Trayan Besesku qo‘ng‘iroq qilib, u bilan uchrashishni so‘ragan ekan-da? — deb yozdi Dodon. — Maslahat bermoqchimidingiz? Menga omadsiz unionistning na maslahatlari, na tajribasi kerak. Ba’zan undagi siyosiy tajribaga ega bo‘lgandan ko‘ra, hech qanday tajribasiz bo‘lgan yaxshiroq”.
Ruminiya parlamentiga saylovlar bo‘yicha kampaniya chog‘ida saylovchilar bilan uchrashuvlar doirasida Moldovada bo‘lib turgan Besesku Dodonga “iste’fo berish va o‘z vaqtini bekorga sarflamaslik”ni maslahat berishini aytdi.
O‘z navbatida Moldovaning yangi saylangan prezidenti Ruminiyadagi muvaffaqiyatsizlikdan so‘ng Besesku Moldovada partiya yoki unionlik harakatini tuzmoqchi ekanligini va endi “o‘zini davlatchi bo‘lgan prezident yonida ekanligini ko‘rsatish uchun” yo‘l izlayotganini taxmin qildi.
Izoh (0)