AQShning sobiq prezidenti Bill Klinton Clinton Foundation xayriya jamg‘armasi mablag‘larini shaxsiy ehtiyojlari uchun ishlatgan. Bu haqda WikiLeaks tomonidan e’lon qilingan hujjatlarga tayanib, The Washington Post ma’lum qildi, deya xabar beradi “TASS”.
Nashrga ko‘ra, jamg‘armada sarflarning “Prezident va uning oilasi xarajatlari” (xususiy tashriflar, mehmonxonalarda yashash, dam olish va hokazo) qismi tuzilgan. Klintonning maslahatchisi Duglas Bend Dow Chemical, Coca-Cola kabi yirik kompaniyalardan mablag‘ yig‘ish va jumladan, ularni Bill Klintonga o‘tkazib berish bilan shug‘ullangan Teneo firmasini tuzgan.
Teneo sheriklari jamg‘armaga 8, Bill Klintonning o‘ziga esa 3 million dollar to‘lagan. Firma mijozlaridan biri 2011—2015-yillarda Klintonga har bir chiqishi uchun 2 million dollargacha, 2013-yilda esa Hillari Klintonga ma’ruzasi uchun 225 ming dollar to‘lab bergan.
Gazeta Bill va Chelsi Klintonning vakillari, ularning o‘zi kabi, yuqoridagi ma’lumotlarga izoh berishdan bosh tortganini ta’kidlamoqda. Hillari Klintonning saylovoldi shtabi rasmiy vakili Glen Keplin ham “Rossiya o‘g‘irlagan va WikiLeaks tomonidan qurol tarzida foydalanilgan” hujjatlarga munosabat bildirishni o‘ziga ep ko‘rmadi.
Izoh (0)