National Geographic jurnali muqovasidagi surati sabab tanilib ketgan afg‘onistonlik qochoq ayol qalbaki hujjatlardan foydalangani uchun Pokiston huquqni muhofaza qilish organlari tomonidan qo‘lga olindi. Bu haqda “TASS” xabar bermoqda.
Sharbat Gula 25-oktabr, seshanba kuni Pokistondagi uyida hibsga olingan. Uning shaxsini tasdiqlovchi Afg‘oniston va Pokiston hujjatlari olib qo‘yilgan.
Xabar berishlaricha, Pokiston ma’muriyati ayolni Afg‘onistondan qochib kelganidan beri mamlakat hududida noqonuniy ravishda yashab kelganlikda aybdor deb sanamoqda.
Agence France-Presse agentligining Pokiston ma’muriyati vakillariga asoslanib xabar berishicha, ayol 14 yilgacha ozodlikdan mahrum etilishi mumkin.
Gula 1985-yili, uning surati National Geographic jurnali muqovasida bosilib chiqqanidan so‘ng mashhur bo‘lib ketgan edi.
O‘sha vaqtda Afg‘onistondagi qochoqlar lagerida yashagan “Afg‘on qizi”ning surati jurnalist Stiv Makkari tomonidan olingan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)