YuNESKO Quddusdagi Ibodatxona tog‘ini musulmonlar tarixiy merosi deb e’lon qiluvchi rezolyutsiyani qabul qildi. Bu haqda, AFP’ga asoslanib, “TASS” xabar bermoqda.
O‘tgan haftada Misr va Falastin tomonidan taklif qilingan rezolyutsiya loyihasining ma’qullanishi Isroilning keskin noroziligiga sabab bo‘lgan edi. Mamlakat YuNESKOdagi ishtirokini vaqtinchalik to‘xtatib qo‘ydi. Hatto Isroil bosh vaziri Binyamin Netanyaxu tashkilotning ushbu qarori yuzasidan ijtimoiy tarmoqlarda kinoyali sharhlar qoldirdi.
Ibodatxona tog‘i — Quddus hududida joylashgan maydon bo‘lib, u yahudiylar uchun birinchi darajali, musulmonlar uchun uchinchi darajali muqaddas qadamjo hisoblanadi. Ushbu maydonda qadimda Birinchi va Ikkinchi Quddus ibodatxonasi mavjud bo‘lgan, bugun esa u yerda al-Aqso masjidi joylashgan.
13-oktabr kuni YuNESKO Misr va Falastin tomonidan taklif etilgan rezolyutsiyani ma’qulladi. Unda Quddusdagi yodgorlik maydoni islom dini bilan bog‘liqligi ta’kidlanadi, yahudiy xalqining qadamjoga aloqadorligi haqida esa hech narsa deyilmaydi. Hujjat Isroilni Quddusda musulmonlar haq-huquqlarini buzayotgani uchun qoralaydi, shuningdek, bundan buyon “Ibodatxona tog‘i” atamasi o‘rniga qadamjo “Masjid al-Aqso” deb atalishini ko‘zda tutadi.
Rezolyutsiyani 58 mamlakatdan 24 tasi ma’qulladi, bular orasida Rossiya, Xitoy, Jazoir, Bangladesh, Marokash, Ummon, Livan, Qatar, Eron, Meksika bor. Isroilni AQSh, Buyuk Britaniya, Litva, Niderlandiya, Estoniya va Germaniya qo‘llab-quvvatladi, qolgan 26 mamlakat ovoz berishdan tiyildi.
Izoh (0)