ЮНЕСКО Қуддусдаги Ибодатхона тоғини мусулмонлар тарихий мероси деб эълон қилувчи резолюцияни қабул қилди. Бу ҳақда, AFP’га асосланиб, «ТАСС» хабар бермоқда.
Ўтган ҳафтада Миср ва Фаластин томонидан таклиф қилинган резолюция лойиҳасининг маъқулланиши Исроилнинг кескин норозилигига сабаб бўлган эди. Мамлакат ЮНЕСКОдаги иштирокини вақтинчалик тўхтатиб қўйди. Ҳатто Исроил бош вазири Биньямин Нетаньяху ташкилотнинг ушбу қарори юзасидан ижтимоий тармоқларда кинояли шарҳлар қолдирди.
Ибодатхона тоғи — Қуддус ҳудудида жойлашган майдон бўлиб, у яҳудийлар учун биринчи даражали, мусулмонлар учун учинчи даражали муқаддас қадамжо ҳисобланади. Ушбу майдонда қадимда Биринчи ва Иккинчи Қуддус ибодатхонаси мавжуд бўлган, бугун эса у ерда ал-Ақсо масжиди жойлашган.
13 октябрь куни ЮНЕСКО Миср ва Фаластин томонидан таклиф этилган резолюцияни маъқуллади. Унда Қуддусдаги ёдгорлик майдони ислом дини билан боғлиқлиги таъкидланади, яҳудий халқининг қадамжога алоқадорлиги ҳақида эса ҳеч нарса дейилмайди. Ҳужжат Исроилни Қуддусда мусулмонлар ҳақ-ҳуқуқларини бузаётгани учун қоралайди, шунингдек, бундан буён «Ибодатхона тоғи» атамаси ўрнига қадамжо «Масжид ал-Ақсо» деб аталишини кўзда тутади.
Резолюцияни 58 мамлакатдан 24 таси маъқуллади, булар орасида Россия, Хитой, Жазоир, Бангладеш, Марокаш, Уммон, Ливан, Қатар, Эрон, Мексика бор. Исроилни АҚШ, Буюк Британия, Литва, Нидерландия, Эстония ва Германия қўллаб-қувватлади, қолган 26 мамлакат овоз беришдан тийилди.
Изоҳ (0)