“Tolibon” harakati va Afg‘oniston hukumati maxfiy ravishda tinchlik muzokaralarini qaytadan boshladi. Bu haqda “TASS” xabar bermoqda.
The Guardian nashrining ham “Tolibon”, ham Afg‘oniston hukumatidagi manbalarga asoslanib xabar berishicha, sentabr oyida va oktabr boshida Qatarda bo‘lib o‘tgan muzokaralarda harakat asoschisining ukasi mulla Abdul Mannon, rasmiy Kobul tomonidan esa Afg‘oniston razvedkasi rahbari qatnashgan.
Gazetaning qayd etishicha, bu 2016-yil may oyida AQSh uchuvchisiz uchar qurilmasi zarbasi oqibatida “Tolibon” yetakchisi mulla Axtar Muhammad Mansur yo‘q qilinganidan beri Afg‘oniston rasmiylari va “Tolibon” vakillari o‘rtasida o‘tkazilgan ilk muzokaralardir.
“Tolibon” vakilining The Guardian’ga ma’lum qilishicha, sentabrdagi uchrashuv “ijobiy ruhda va ortiqcha qiyinchiliklarsiz” o‘tgan. Mazkur muzokaralar hozircha rasman tasdiqlanganicha yo‘q.
“Tolibon” harakatidagi manbaning qo‘shimcha qilishicha, uchrashuvda amerikalik diplomat ham qatnashgan. AQShning Afg‘onistondagi elchixonasi mazkur axborot yuzasidan izoh berishdan bosh tortgan. Gazeta ma’lumotiga ko‘ra, muzokaralarda Pokistondan vakillar bo‘lmagan.
Afg‘oniston hukumatining “Tolibon” rahbariyati bilan so‘nggi uchrashuvi 2015-yil iyul oyida bo‘lib o‘tgan edi, unda AQSh va Pokiston vakillari ham qatnashgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)