Mumbayda Nyu-Deli buyurtmasi bilan qurilayotgan Scorpene sinfidagi Fransiya suv osti kemalarining taktik-texnik xususiyatlari va uskunalari haqidagi ma’lumotlar Hindistondan emas, Fransiyadan tarqalib ketgan. Bu haqda Hindiston harbiy-dengiz kuchlari bosh qo‘mondoni Sunil Lanba ma’lum qildi, deb yozadi “TASS”.
“Dastlabki tekshiruv shuni ko‘rsatdiki, ma’lumotlar Hindistondan emas, Fransiyaning DCNS kompaniyasi ofisidan tarqalgan”, — dedi Lanba. Bosh qo‘mondonning qo‘shimcha qilishicha, Hindistonda maxfiy hujjatlarning chiqib ketishini tekshirish bo‘yicha maxsus qo‘mita tuzilgan. Fransiya va DCNS kompaniyasi ham o‘z tekshiruvlarini o‘tkazmoqda.
Scorpene suv osti kemalari atrofidagi shov-shuv avgust oyida Avstraliya OAVlari qator Janubi-Sharqiy Osiyo kompaniyalari ixtiyorida, keyinroq esa ochiq manbalarda Fransiyaning DCNS kompaniyasi tomonidan yaratilgan Scorpene suv osti kemalarining jangovar tizimlari, shuningdek, uskunalari haqidagi 22 ming sahifali maxfiy hujjatlar paydo bo‘lgani haqida xabar tarqatgandan so‘ng boshlandi. Ushbu sinfdagi oltita submarina ayni paytda Hindiston harbiy-dengiz kuchlari buyurtmasiga binoan qurilmoqda.
Izoh (0)