Мумбайда Нью-Дели буюртмаси билан қурилаётган Scorpene синфидаги Франция сув ости кемаларининг тактик-техник хусусиятлари ва ускуналари ҳақидаги маълумотлар Ҳиндистондан эмас, Франциядан тарқалиб кетган. Бу ҳақда Ҳиндистон ҳарбий-денгиз кучлари бош қўмондони Сунил Ланба маълум қилди, деб ёзади «ТАСС».
«Дастлабки текширув шуни кўрсатдики, маълумотлар Ҳиндистондан эмас, Франциянинг DCNS компанияси офисидан тарқалган», — деди Ланба. Бош қўмондоннинг қўшимча қилишича, Ҳиндистонда махфий ҳужжатларнинг чиқиб кетишини текшириш бўйича махсус қўмита тузилган. Франция ва DCNS компанияси ҳам ўз текширувларини ўтказмоқда.
Scorpene сув ости кемалари атрофидаги шов-шув август ойида Австралия ОАВлари қатор Жануби-Шарқий Осиё компаниялари ихтиёрида, кейинроқ эса очиқ манбаларда Франциянинг DCNS компанияси томонидан яратилган Scorpene сув ости кемаларининг жанговар тизимлари, шунингдек, ускуналари ҳақидаги 22 минг саҳифали махфий ҳужжатлар пайдо бўлгани ҳақида хабар тарқатгандан сўнг бошланди. Ушбу синфдаги олтита субмарина айни пайтда Ҳиндистон ҳарбий-денгиз кучлари буюртмасига биноан қурилмоқда.
Изоҳ (0)