AQSh Milliy aerokosmik agentligi (NASA) Rossiyaning Norilsk shahri yaqinidagi qizil tusga kirgan Daldikan daryosining 2001- va 2016-yillarda sun’iy yo‘ldoshdan olingan suratlarini ko‘rsatdi, deb yozadi “RBK”.
NASA ma’lumotlariga ko‘ra, daryo suvi 2016-yilda aniqlanganidan ancha avvalroq qizarishni boshlagan. Daryo 2001-yil avgustida ham qizil rangda bo‘lgan.
“Sun’iy yo‘ldoshlar Norilsk atrofidagi suvlarning qizil rangdagi tasvirlarini bir nechta davrlarda, jumladan, 2015-yil iyulida, 2014-yil iyulida, 2013-yil avgustida, 1998-yil iyulida va 1997-yil sentabrida ham olgan. Suratlarda daryoning issiq fasllardagi, suv muzlamaydigan paytlardagi holati aks etgan”, — dedi olimlar.
Kembridj universiteti tadqiqotchisi Garet Riz ma’lum qilishicha, 1990-yillar o‘rtalarida Norilskka tashrifi chog‘ida qizil tusdagi suvni shaxsan o‘zi ko‘rgan.
Avvalroq Rossiyaning “Norilskiy nikel” tog‘-metallurgiya kompaniyasi Krasnoyarsk o‘lkasidagi Daldikan daryosining sentabr boshida to‘q qizil tusga kirib qolgani sababini tushuntirgan, bunga daryoga Nadejenskiy metall zavodi suv omboridan ifloslangan suvning oqib ketishi sabab bo‘lganini aytgan edi.