АҚШ Миллий аэрокосмик агентлиги (NASA) Россиянинг Норильск шаҳри яқинидаги қизил тусга кирган Далдикан дарёсининг 2001 ва 2016 йилларда сунъий йўлдошдан олинган суратларини кўрсатди, деб ёзади «РБК».
NASA маълумотларига кўра, дарё суви 2016 йилда аниқланганидан анча аввалроқ қизаришни бошлаган. Дарё 2001 йил августида ҳам қизил рангда бўлган.
«Сунъий йўлдошлар Норильск атрофидаги сувларнинг қизил рангдаги тасвирларини бир нечта даврларда, жумладан, 2015 йил июлида, 2014 йил июлида, 2013 йил августида, 1998 йил июлида ва 1997 йил сентябрида ҳам олган. Суратларда дарёнинг иссиқ фасллардаги, сув музламайдиган пайтлардаги ҳолати акс этган», — деди олимлар.
Кембридж университети тадқиқотчиси Гарет Риз маълум қилишича, 1990 йиллар ўрталарида Норильскка ташрифи чоғида қизил тусдаги сувни шахсан ўзи кўрган.
Аввалроқ Россиянинг «Норильский никель» тоғ-металлургия компанияси Красноярск ўлкасидаги Далдикан дарёсининг сентябрь бошида тўқ қизил тусга кириб қолгани сабабини тушунтирган, бунга дарёга Надеженский металл заводи сув омборидан ифлосланган сувнинг оқиб кетиши сабаб бўлганини айтган эди.
Изоҳ (0)