Italiyada politsiya uch kun davomida dronlar yordamida Sangvinara daryosida suzib yurgan o‘yinchoq timsohni izlab topdi. Bu haqda Wanted in Rome nashri xabar bermoqda.
Ma’lum qilinishicha, Italiyaning Ladispoli shahrida yashovchilar uch kun davomida Sangvinara daryosida suzib yurgan “timsoh”dan vahimaga tushgan.
O‘yinchoqning video va fotosuratlari 26-iyul shanba kuni ijtimoiy tarmoqlarda paydo bo‘lgan. Shundan so‘ng, bu haqiqiy vahimaga va politsiya tekshiruviga sabab bo‘lgan. Mahalliy hokimiyat va ko‘ngillilar dronlardan foydalanib keng ko‘lamli qidiruv ishlarini boshlagan.
Operatsiya 29-iyul seshanba kuni, bir ayolning mahalliy telekanalga bu yaqin atrofdagi bolalar maydonchasi yonida qoldirilgan puflanadigan o‘yinchoq ekanligini aytganidan so‘nggina yakunlangan.
Ladispoli meri Alessandro Grando rasmiy bayonotida daryoda xavfli sudralib yuruvchilar yo‘qligini ma’lum qilgan. U sodir bo‘lgan voqeani “soxta xavotir” deb atadi va barcha choralar aholining xavfsizligini ta’minlash uchun ko‘rilganini ta’kidlagan.
Shahar ma’muriyati allaqachon “vahima uyg‘otgani” uchun sudga murojaat qilmoqchi ekanligini ma’lum qildi, ammo shikoyat aynan kimga qarshi yo‘naltirilishi bo‘yicha aniqlik kiritilmagan.
Izoh (0)