Joriy yil boshidan beri hududda kambag‘allik darajasi 7,5 foizdan 6,4 foizga pasaydi. Bu haqda 30-iyul kuni prezident Shavkat Mirziyoyev o‘tkazgan yig‘ilishda axborot berildi.
Prezident axborot xizmati xabariga ko‘ra, oxirgi sakkiz yilda Samarqand viloyatida 1 ming 132 ta ko‘p qavatli uy qurilgan. Jami 56 ming oilaning turmush sharoiti yaxshilangan. Maktabgacha taʼlim qamrovi 21 foizdan 73 foizga, oliy taʼlimda 10 foizdan 45 foizga yetgan.
Iqtisodiyotda to‘qimachilik, metallurgiya, elektr texnikasi, qurilish materiallari, turizm jadal rivojlanmoqda. Bunyodkorlik, yirik loyihalar va yuqori daromadli ish o‘rinlari aholining ertangi kunga ishonchini oshirmoqda.
“Viloyatda kambag‘allik darajasi yil boshidan beri 7,5 foizdan 6,4 foizga kamaygan. Yil yakunigacha 150 ming odamni ishga joylab, 90 ming aholini kambag‘allikdan chiqarish maqsad qilingan”, deyiladi manbada.
Sakkiz yil davomida hududda sanoat mahsulotlari 1,7 barobar o‘sib, hozir 45 trillion so‘mdan oshgan. Lekin bu natijalarning 37 foizi Samarqand shahriga, 23 foizi Jomboy, Samarqand va Urgut tumanlariga to‘g‘ri keladi. Qo‘shrabot, Payariq va Nurobodda sanoat nisbatan rivojlanmagan.
“Nurobod tumanida 115 gektarda maxsus sanoat zonasi tashkil qilish taklif etilmoqda. U yerda 472 million dollarlik investitsiya loyihalari amalga oshirilib, 1 ming 200 ta ish o‘rni yaratiladi. Qo‘shrabot tumanida xitoylik investorning 40 million dollar to‘g‘ridan-to‘g‘ri sarmoyasi hisobiga granit toshini qazib olish va qayta ishlash mo‘ljallangan. Bulung‘urlik tadbirkor “in vitro” laboratoriya tashkil etib, kartoshka urug‘i bo‘yicha brend yaratishga kirishgan. Tumanda 100 million dollarlik biofarmatsevtika korxonasini ishga tushirish ham rejalashtirilgan”, deya qayd etilgan Prezident matbuot xizmati xabarida.
Tahlilga ko‘ra, viloyatda 1 milliard 200 million dollarlik 14 ta yangi loyiha shakllantirilgan. Ularning natijasida 12 ming ish o‘rni, 82 million dollarlik eksport imkoniyati ochilishi ko‘zda tutilgan.
Prezident bu tashabbuslarni qo‘llab-quvvatlab, loyihalarni jadallashtirish bo‘yicha ko‘rsatmalar bergan. Har bir tuman-shaharning investitsion jozibadorligi va eksport imkoniyatlarini tengma-teng oshirish zarurligi taʼkidlangan.
Izoh (0)