Erdo‘g‘on Nazarboyevga Rossiya bilan munosabatlar izga tushishiga qo‘shgan hissasi uchun minnatdorlik bildirdi

Turkiya prezidenti Rajab Toyyib Erdo‘g‘on telefon orqali muloqot chog‘ida qozog‘istonlik hamkasbi Nursulton Nazarboyevga Rossiya bilan munosabatlar izga tushishiga qo‘shgan hissasi uchun minnatdorlik bildirdi. Suhbat turk tomoni tashabbusi bilan bo‘lib o‘tgani bildirilmoqda, deya xabar beradi “TASS”.

“Turkiya prezidenti Qozog‘iston rahbarini Turkiya va Rossiya o‘rtasida barcha yo‘nalishlardagi munosabatlar yo‘lga qo‘yilishiga qo‘shgan bebaho hissasi va salmoqli mehnati uchun samimiy minnatdorlik bildirdi. Rossiya prezidenti Vladimir Putin bilan bo‘lib o‘tgan suhbati haqida ma’lum qildi va Anqara hamda Moskva yaqinlashuviga qaratilgan barcha harakatlar ro‘yobga chiqishiga umid bildirdi”, — deya ta’kidlagan Qozog‘iston prezidenti matbuot xizmati.

Matbuot xizmatiga ko‘ra, Erdo‘g‘on Qozog‘iston prezidentiga yaqin orada Turkiyaga tashrif bilan kelishni taklif etgan.