Shu yilning yanvarida eronliklar tomonidan Fors ko‘rfazida qo‘lga olingan amerikalik dengizchilar Islom Respublikasi maxsus xizmatlari o‘tkazgan so‘roq chog‘ida muhim maxfiy axborotni taqdim etgan. Bu haqda AQSh harbiy-havo kuchlarining hodisa haqidagi hisobotiga tayanib, “TASS” xabar berdi.
“So‘roq paytida ekipajning ba’zi a’zolari o‘z ism-sharifi, unvoni, harbiy xizmatchining shaxsiy raqami va tug‘ilgan sanasidan tashqari, qo‘shimcha ma’lumotni ham taqdim etgan”, — deyiladi ma’ruzada. Dengizchilar, shuningdek, eronliklarga o‘z katerlari xususiyatlarini gapirib bergan, shaxsiy mobil telefon va noutbuklari parollarini taqdim etgan.
Hisobotda aytilishicha, “dengizchilar va ularning komandirlari yo‘l qo‘ygan ketma-ket xatolar tufayli” ular hibsga olingan.
Eslatib o‘tamiz, 2016-yil yanvarida AQSh harbiy-dengiz kuchlarining Kuvaytdan Bahraynga qarab ketayotgan ikkita kateri Eron hududiy suvlariga kirib qolgani va qo‘lga olingani haqida xabar berilgan edi. Ta’kidlanishicha, bu katerlardan biri ishdan chiqqach, sodir bo‘lgan. O‘n nafar ekipaj a’zosi hibsga olingan.
Keyinroq Tehron Amerika harbiy kemalari Eron hududiy suvlariga bostirib kirgani uchun AQShdan uzr so‘rashni talab qilgandi.
Izoh (0)