Hindistonning Puna shahri politsiyasi avvalroq o‘zlarini Everestni zabt etgan birinchi hind oilasi deb e’lon qilgan er-xotinni tekshirish ishlarini boshladi, deb yozadi “RIA Novosti”.
Tekshiruv boshlanishiga mahalliy alpinistlardan kelib tushgan shikoyat xati sabab bo‘ldi, ular Dinesh va Tarakeshvari Ratxod dunyodagi eng baland cho‘qqini aldov yo‘li bilan — fotosuratlarga Photoshop dasturida ishlov berish orqali zabt etganiga ishonchi komil.
Politsiya komissari esa ekspertlar bilan suhbatlashgach, ularning fikriga tayangan holda o‘z qo‘l ostidagilarga tekshiruv boshlashni buyurgan.
Er-xotinning Everest cho‘qqisiga chiqqani aks etgan suratlar shubha keltirib chiqardi. Masalan, Dinesh cho‘qqida Hindiston bayrog‘ini ko‘tarib tushgan suratda Photoshop’da ishlanganlik belgilarini ko‘rish mumkin. Bundan tashqari, rasmlarga ko‘ra, er-xotin o‘z kiyim va anjomlarini doim o‘zgartirib turgan, biroq tajribali alpinistlar aytishicha, cho‘qqiga ko‘tarilish chog‘ida ob-havo sharoitlari tufayli, kiyim almashtirib bo‘lmaydi.
Izoh (0)