Shotlandiya hukumati Buyuk Britaniya tarkibidan chiqish bo‘yicha qayta referendum o‘tkazish bo‘yicha qonun loyihasini taqdim etishga tayyorgarlik ko‘rmoqda. Bu haqda mamlakat birinchi vaziri (hukumat rahbari) Nikola Sterjen ma’lum qildi, deya xabar beradi “RBK”.
“Mustaqillik haqidagi ikkinchi referendum, shubhasiz, o‘ta faol muhokamani talab etuvchi variant. Yaqin orada bu yuzasidan tegishli qarorlar qabul qilinadi. Hukumat Shotlandiyaning Yevroittifoqdagi o‘rnini himoya qilish bo‘yicha bevosita Bryussel bilan bahs olib borishga harakat qiladi”, — deya ta’kidlagan Sterjen.
Birinchi vazirga ko‘ra, huquqiy, moliyaviy va diplomatik masalalar bo‘yicha ekspertlar ishtirokida maslahat guruhi tuziladi. “Biz qat’iy harakat qilishga chog‘langanmiz, biroq oldinga qadam tashlash yo‘lida butun Shotlandiya birdamligini saqlab qolishga intilamiz”, — deya ma’lum qilgan Sterjen.
2014-yilda o‘tkazilgan referendum chog‘ida shotlandiyaliklarning 55,3 foizi Buyuk Britaniya tarkibida qolishni yoqlab ovoz bergan edi. Ammo Brexit yuzasidan tashkil etilgan referendumda shotlandiyaliklarning ko‘pchilik qismi (62 foiz) Yevroittifoq tarkibida qolish niyatini bildirdi.
Izoh (0)