Шотландия ҳукумати Буюк Британия таркибидан чиқиш бўйича қайта референдум ўтказиш бўйича қонун лойиҳасини тақдим этишга тайёргарлик кўрмоқда. Бу ҳақда мамлакат биринчи вазири (ҳукумат раҳбари) Никола Стержен маълум қилди, дея хабар беради «РБК».
«Мустақиллик ҳақидаги иккинчи референдум, шубҳасиз, ўта фаол муҳокамани талаб этувчи вариант. Яқин орада бу юзасидан тегишли қарорлар қабул қилинади. Ҳукумат Шотландиянинг Евроиттифоқдаги ўрнини ҳимоя қилиш бўйича бевосита Брюссель билан баҳс олиб боришга ҳаракат қилади», — дея таъкидлаган Стержен.
Биринчи вазирга кўра, ҳуқуқий, молиявий ва дипломатик масалалар бўйича экспертлар иштирокида маслаҳат гуруҳи тузилади. «Биз қатъий ҳаракат қилишга чоғланганмиз, бироқ олдинга қадам ташлаш йўлида бутун Шотландия бирдамлигини сақлаб қолишга интиламиз», — дея маълум қилган Стержен.
2014 йилда ўтказилган референдум чоғида шотландияликларнинг 55,3 фоизи Буюк Британия таркибида қолишни ёқлаб овоз берган эди. Аммо Brexit юзасидан ташкил этилган референдумда шотландияликларнинг кўпчилик қисми (62 фоиз) Евроиттифоқ таркибида қолиш ниятини билдирди.
Изоҳ (0)