Islandiyada 25-iyun, shanba kuni prezidentlik saylovlari boshlandi. Uning natijalariga ko‘ra 1996-yildan beri birinchi marta davlat rahbari o‘zgaradi, deya xabar beradi “TASS”.
Oxirgi jamoat fikri so‘rovlariga ko‘ra, respondentlarning 44,6 foizi tarixchi Gudni Yoxannesson uchun ovoz berishga tayyor. Ikkinchi o‘rinda bir hafta davomida tarafdorlari sonini 6 foizga oshirishga muvaffaq bo‘lgan tadbirkor Xalla Toumasdottir (18,6%) qayd etildi. Mamlakatning sobiq bosh vaziri va Morgunbladid gazetasi muharriri David Oddssonni so‘ralganlarning atigi 16 foizi qo‘llab-quvvatlashga tayyor. Yozuvchi va atrof-muhit himoyachisi Andri Snayr Magnason uni ta’qib etib bormoqda (15,9%).
Qolgan 5 nafar nomzod respondentlarning hatto 3% ham ovozini to‘plolmagan.
Eslatib o‘tamiz, 20 yil davomida orol-davlat rahbari lavozimini egallab kelgan Islandiya prezidenti Olavur Ragnar Grimsson saylovlarda oltinchi bor ishtirok etishdan voz kechdi. Bunga jurnalistlar uning turmush o‘rtog‘i, Buxoro yahudiylariga mansub Mussayefflar (Musayevlar) oilasi vakili Dorrit Mussayeff ofshor kompaniyalari bilan bog‘liqligini aniqlagani sabab bo‘lgani bildirilgandi.
Izoh (0)