Buyuk Britaniyaning YeI tarkibidan chiqishi (Brexit) to‘g‘risidagi referendum natijalari Gibraltar atrofidagi vaziyatni butunlay o‘zgartirib yubordi, deb ishonmoqda Ispaniya tashqi ishlar vaziri Xose Manuel Garsiya-Margalyo. Bu haqda, Reuters’ga asoslanib, “RBK” xabar bermoqda.
Uning so‘zlariga qaraganda, yangi siyosiy reallikda Ispaniya 1713-yildan beri Britaniya hukmronligi ostida qolayotgan mitti yarim orolni birgalikdagi boshqaruvga o‘tkazishga va sekin-asta hududda o‘z nazoratini qayta tiklashga harakat qiladi.
“Vaziyat butunlay o‘zgardi, bu Gibraltar bo‘yicha yangi, uzoq payt amalga oshmas deb hisoblangan imkoniyatlarni ochadi. Ishonamanki, birgalikdagi boshqaruv, to‘g‘ri gapiraman, Skala uzra Ispaniya bayrog‘ining hilpirashi ilgarigidan ko‘ra ancha haqiqatga yaqin taxminga aylandi”, — dedi u.
Gibraltarni Ispaniya yurisdiksiyasiga qaytarish borasidagi referendumlar 1967- va 2002-yillarda o‘tkazilgan edi. Ikki marta ham Britaniya tarafdorlari katta tafovut bilan (99,64 va 98,48 foiz) g‘alaba qozongan edi.
Eslatib o‘tamiz, Buyuk Britaniyada o‘tkazilgan referendum davomida saylovchilarning yarmidan ko‘prog‘i mamlakatning YeI tarkibidan chiqishini yoqlab ovoz berdi.
Izoh (0)