Qozog‘iston aksilterrorchilik markazi Aqto‘bedagi teraktlarga aloqadorlarni qo‘lga olish bo‘yicha maxsus operatsiya o‘tkazilishi haqida ma’lum qildi. Bu haqda, Qozog‘iston Milliy xavfsizlik qo‘mitasi saytida keltirilgan ma’lumotga tayanib, “Vedomosti” xabar bermoqda.
“Taslim bo‘lish haqidagi taklifga terrorchilar qurolli qarshilik bilan javob qaytardi. Aqto‘be viloyatining terrorizmga qarshi kurashish tezkor shtabi tomonidan operatsiya o‘tkazilmoqda. Tadbirlar davom etmoqda, ularning natijalari haqida yana xabar beriladi”, — deyiladi qo‘mita xabarida.
Eslatib o‘tamiz, 5-iyun kuni Aqto‘be shahridagi uchta tumanda otishma bo‘lib o‘tdi, unda uch harbiy va to‘rt fuqaro halok bo‘ldi, kamida 38 kishi yaralandi. Qozog‘iston IIV hodisani terakt deb baholadi.
Avvalroq hukumat kuchlari 13 nafar terrorchini yo‘q qilganligi, yana 14 nafari yaralanganligi va ikki nafari qo‘lga olinganligi haqida ma’lum qilingan edi. Terrorchilarning olti nafari qidirilmoqda, ularning qayerda ekanligi haqidagi ma’lumot uchun 5 million tenge mukofot puli e’lon qilingan.
Izoh (0)