Xitoyning Sichuan provinsiyasidagi ilmiy-tadqiqot markazlaridan birining xodimi maxfiy hujjatlarni pullagani uchun o‘lim jazosiga mahkum etildi, deya xabar bermoqda “RIA Novosti” Xitoy Markaziy televideniyesi (CCTV)ga tayanib.
Xabarlarga ko‘ra, Xuan Yuy ismli erkak 150 mingta maxfiy hujjatni chet el maxsus xizmatlariga sotib yuborishda ayblangan. Ulardan 90 tasiga “o‘ta maxfiy” belgisi tushirilgan, 300 ga yaqini esa “maxfiy” deya belgilangan.
Ta’kidlanishicha, erkak Chendu shahridagi ilmiy-tadqiqot markazida 1990-yillar oxiridan beri kompyuter mutaxassisi sifatida ishlab kelgan, uning markazi esa kriptografiya (sirli belgi va ishoralar bilan yozish tizimi) sohasidagi ishlanmalar bilan shug‘ullanadi. Erkak maxfiy kodlar bo‘lgan fayllar nusxalarini saqlab qo‘ygan, so‘ng xorijiy mamlakatga sotgan, ammo ularni sotib olgan davlat nomi oshkor etilmayapti.
Erkak hujjatlarni sotib, 700 ming dollarga yaqin pul ishlagan. Hukumat uni 2011-yilda hibsga olgan va ushbu mablag‘ni musodara qilgan. Unga oldi-sotdida yordam bergan rafiqasi esa besh yillik qamoqqa hukm etildi.
Telekanal hukm ijro etilgan-etilmaganiga aniqlik kiritmadi.
Izoh (0)