AQSh Markaziy razvedka boshqarmasi (MRB) so‘roqlar chog‘ida suv bilan qiynash kabi uslublardan foydalanmaydi. Bu haqda boshqarma direktori Jon Brennan NBC telekanaliga bergan intervyusida ma’lum qilgan, deya xabar beradi “TASS”.
“Men bu kabi qator uslublarning qo‘llanishini yoqlamayman, chunki tashkilotimiz rivojlanishi kerak. MRBning qaysidir xodimi yana suv bilan qiynashdan foydalanishiga rozilik bermayman”, — deya ta’kidlagan Brennan.
Bunday so‘roqlar chog‘ida yotgan holda majburiy ushlab turilgan kishining boshi sochiq yordamida o‘raladi va ustidan suv quyiladi. Shu tariqa qiynoqqa solingan kishi suvda cho‘kayotgan odam holiga tushadi.
2014-yil oxirida AQSh Kongressi mamlakat maxsus xizmatlari tomonidan terrorchilikda gumon qilinayotgan shaxslarga nisbatan qiynoqlar qo‘llangani haqida rasmiy hisobot e’lon qilgan, shundan so‘ng prezident Barak Obama “Amerika qadriyatlariga to‘g‘ri kelmaydigan” bunday uslublardan ortiq hech qachon foydalanilmasligini ma’lum qilgandi.
Izoh (0)